Napparsimasunut angalaqataaneq akisuukasiuvoq
Radioaviisimi eqqaasariikkatsitut kalaallit meeqqat napparsimasut Danmarkimut Kalaallilluunniit Nunaanni illoqarfinnut annernut kisimiitillugit katsorsartikkiartortinneqartarput, meeqqammi 15-inik ukioqalereersimagaangata angajoqqaap aappaata ingiaqatiginninnissaanut Namminersornerullutik Oqartussat akiliineq ajormata.
Malittarisassat allanngortinneqaraluarpata qanoq akeqassanersoq, Radioaviisimiit Peqqinnissaq pillugu qullersaqarfimmut naatsorsortipparput.
Naminersornerullutik Oqartussat 2006-imi meeqqat 15-it inorlugit ukiullit 81-it Københavnimut katsorsartikkiartortut angajoqqaaminnik ingiaqateqartinneqarput, meeqqallu 352-it Nuummi Dronning Ingridip napparsimavissuanut katsorsartikkiartortut qanigisaminnit ingiaqateqartineqarlutik. Napparsimasut 15-nik ukioqalereersimasut ataasiakkaaginnaat angajoqqaaminnik ingiaqateqartinneqarput tassa immikkut ittumik aqqutaani paarsarisariaqaraluarlutik, paaqqinnittoq sygeplejerskiusariaqanngimmat.
Taamatut meeqqanut napparsimasunut angalaqataanernut aningaasartuutit 2006-imi 5,8 millioni koruuniupput. Malittarisassat allanngortillugit 18-it inorlugit ukiullit ingiaqataannut aningaasaliisalissagaluaraanni, soorlu Norgimi taamaattoq, taava qaavatigut 1,7 millioni koruuninik akeqassaaq. Paasissutissat Peqqinnissaq pillugu qullersaqarfimmi pisortamit, Søren Rendalimit pivagut, eqqoqqissaartunilli kisitsisaateqartoqanngimmat kisitsinerit allat naapertorlugit eqqoriaavugut. Kisitsisilli piviusunik uniuivallaarnerunavianngitsut Søren Rendalip oqaatigaa. Soorunami malittarisassat allanngortillugit 18-it inorlugit ukiullit napparsimasut ingiaqataasa akiliuttalernissaat orniginaraluartoq, katsorsartinnissanut peqqussutit annertusiartuinnartillugit, sipaarniartariaqartuarlutalu, taamaaliornissatsinnut periarfissaqanngilagut, Søren Rendal Radioaviisimut allappoq.
