Napparsimasoq kommunimi sulisunit annaanneqarpoq
Tunumi illoqarfimmi napparsimmavimmi napparsimasoq aanaartorujussuummat inuunerata annaannissaanut aalersorneqarnissaa pisariaqarsimavoq. Napparsimmaviulli peqqumaasiviani aalersuutissat nungussimapput, timmisartorlu Nuuliartussaq silap ajornera peqqutigalugu aallarsinnaasimanngilaq. Kommuneqarfik Sermersooq tusagassiutinut allappoq.
Taavami qanoq iliortoqarpa? Napparsimmavimmi sulisut Tasiilami suliffeqarfimmut anginerpaamut sianerput, tamannalu iluatsippoq. Napparsimasumut aalersuutissat puussiaasat pingasut akunnerit marluk ingerlanerani pissarsiarineqarput.
Suli amerlanerusut aaversinniaraluarput napparsimasorli aaqatigisimanngilaat. Aammik tuniserusussimagaluartut napparsimmaviup siunissami aaversittartunngorsinnaanerannik neqeroorfiginiarpai.
Napparsimmavimmi nakorsaanerup Hans Christian Florian Sørensenip aammik pisariaqartitsinerminni tuniserusuttoqarnera nuannaarutigingaarpaa.
- Tasiilami innuttaasut ikiuukkusuttarnertik taamaalilluni takuteqqippaat. Tamannalu tulliani pisariaqalissagaluarpat qanoq iliuuseqapallannissaq maanna ilikkarparput immikkullu aningaasartuutaasussamik timmisartumik attartornissaq pisariaqarpiarunnaassalluni, nakorsaaneq Hans Christian Florian Sørensen oqarpoq.
