Napaattuup tunuarnera pissusissamisoornerarpaat

Sinerissami Siumut sinnerlugu borgmesterit amerlanersaat isumaqarput, Jens Napaattuup naalakkersuisutut tunuarnera pississamisoortoq.

- Soorunami ajuusaarnarpoq, pisulli tunngavigalugit Hans Enoksenip Napaattuullu aalajangernerat akueriinnartariaqarparput, Uummannami bormesteri Jens Lars Flesicher oqarpoq.

Tasiilami borgmesteri Vittus Mikaelsen isumaqarpoq, pisumi matumani Jens Napaattuup inuttaa malersorneqartoq, taamaattorli aalajangernera eqqortuunerarlugu, atorfilittami ilaquttamilu ilanngunneqarnerat tunngavilersuutigimmagit.

Nanortallip borgmesteriata Tage Frederiksenip neriuutigaa, Napaattuup naalakkersuisutut akisussaaffigisimasaa piaartumik inuttalerneqassasoq. Kujataanit Islandimut silaannakkut angallannermut tunngasut piaartumik aaqqiivigineqarniassammata.

Otto Jerimiassenip Kangaatsiami bormesterip Napaattuup tunuartariaqalernera ajuusaarnartuunerarpaa. Siumukkut naalakkersuisuutitaannik aatsaat tunuartoqalinngimmat.