Nanuaraq Aggumik atserpaat
Nanuaraq ullumi atserneqartoq, angutiviaasoq sapaatip akunnerata siuliani paasineqarmat, atissaanik siunnersuutinik aviisimi Politikenimi atuartartut aammalu Facebookimi atuisartut periarfissinneqarput, unamminermilu "ajugaasoq" ullumi saqqummiuneqarpoq.
Oqaasiliorfik ikiortigalugu nanuaqqap taaguutissaatut piukkunneqartut 15-it aviisimi Politikeninimi Facebookimilu saqqummersinneqarput, piukkunnartutut taaneqarsinnaapput, Kunuk, Qaqu, Anori aamma Siku.
Taaguutinik piukkunneqartunik unammisitsineq ippassaq unnukkut matuneqarpoq.
Nanuaqqap Prebenimik taaguuteqarnissaa Facebookimi atuisartunit siunnersuutigineqarsimagaluarpoq, kisiannili tassa uumasuusiviup tamanna isumaqatigisinnaanngilaa.
Uumasuusivimmi uumasut ilaat alla Prebenimik taagorneqarnissaa siunnersuutigineqarpoq, kisianni tassa nannup piaraa qallunaatut taaguuteqarani kalaallisut ateqassaaq.