Nanuarannguaq Knut nerineqassava?
Nanuaraq nunarsuaq tamakkerlugu tusaamasaasoq, Knut, nakkutigeqqissaarneqalerpoq, tassa Knutip toqunneqarnissaanik sioorasaarummik Berlinimi uumasuusivissuarmi tigusaqartoqarsimammat.
Tyskit politiivi taama nalunaaruteqarput.
Knutimut – sisamanik qaammatilimmut – sioorasaarut assaannarmik allagaasoq Berlinimi uumasuusivissuarmut ippassaq nassiunneqarsimavoq. Sioorasaarut politiinit upperineqarpoq, naak oqariartaatsinik paatsuunganartunik allagaagaluartoq.
Aviisimi Bild-imi allaaserisaq naapertorlugu, nanuaqqap anaanaqanngitsup inaa ungalusaq 15-inik paarsisulerneqarsimavoq. Nanuaqqap toqunneqarnissaa uumasunik illersuiniaqatigiit siusinnerusukkut piumasarigaluarpaat. Bild-imi aamma allaaserineqarpoq, politeeq inuinnartut atisalersorsimasoq walkie-talkie-mik radiuaralik ujaqqap tunuani toqqoqqasoq, tassanngaanniillu ungalusaq tamaat takusinnaagaa.
Uumasuusivissuarmiit oqaatigineqarpoq, Knut-imik takunnikkusuttut suli takuniaasinnaasut, taannami uumasuusivissuup ussagarneqarneranut pingaarnerpaalersimammat.
Knutiaqqap toqunneqarnissaanik sioorasaarisut nanuarannguup neqaa illigalugu taamaaliornersut oqaluttuami eqqaaneqanngilaq.
