Nanortallip Eqqartuussiviani suliassat 60-it utaqqipput

Nanortalimmi politiit suliakkiissutaat 60-it Nanortallip Eqqartuussiviani suliarineqarnissaminnut utaqqipput.

Eqqartuussiviit sivisuumik suliarinninniartarnerat Kalaallit Nunaanni qaqutigoortuunngitsoq, Kalaallit Nunaanni eqqartuussisuuneq Søren Søndergård Hansen oqarpoq.

- Eqqartuussiviit, taamatuttaaq Nanortalimmi, suliarinninniartarnerat sivisusarpoq, Søren Søndergård Hansen, Sermitsiamut oqarpoq, suliallu sivisusarneri pillugit ilaatigut ima nassuiaateqarluni:

- Allatsit akissarsiakippallaarnerata kingunerisaanik pisinnaalluartumik sulisussarsiniartarneq ilungersunartorujussuuvoq. Kalaallit Nunaanni ilinniagaqarsimanerup appasinnera sulisussallu ilinniarluarsimasut piumaneqartorujussuunerat aamma pissutaaqataapput, Kalaallit Nunaanni eqqartuussisuuneq Søren Søndergård Hansen oqarpoq.