Nanortallip eqqaani kuultisiornissaq akuerineqarpoq

Nanortallip pigisaani kultisiorfimmik Nalunaq Gold Mine-mik piginnittut, Crew, London-mi angerlarsimaffeqartut, piginneqatinilu Namminersornerullutik Oqartussanit pigineqartoq Nuna Minerals, Nanortallip eqqaani sumiffinni assigiinngitsuni pingasuni kultimik nutaamik ujarlernissaminnut akuerineqarsimapput, ujarlerfigisassaallu siornatigut misissuiffigineqareersimasut, Ole Kristiansen Nuna Minerals-ip pisortaanera oqarpoq.

-Misissuiffigisassaatut 265 m2 katillugit akuersissuteqarfigisimavagut. Taakku Uunartup kangiatungaani Niaqornaarsuup Qeqertaasaani ilaatigut inissisimapput. Sermiliup qinnguatungaani Ippatit kuuani aamma akuersissummik pivugut, taamatullu Nanortalimminngaanniit Tasiusaliaraanni Tasiusaarsuk. Taassuma qulaa tungaani ujaraqarfiit aamma akuersissutigineqarput.

Soorunami misissuigatta isumalluarpugut. Kuuit kinngarnanit katersineq taakkulu aatsitassanik assigiinngitsunik akuinik uuttortaaneq siornatigut misissuiffigisarsimasavut. Tassani takusinnaavarput Nanortallip eqqaani nunaminertani taaneqartuni, kuuit ilarpassui gultimik akoqallattaartut. Taamaattumik taakku kultit kuunniittut pinngorfii, qaarsut pinngorfii

nassaariniassallugit massakkut suliassarivarput, Ole Kristiansen oqarpoq.

Kulteqarneranik misissueqqinneq aappaagu aallartissaaq ukiunilu tallimani sivisussuseqassalluni.