Nanortalimmiut nioqqutissanik akikitsunik iluarusupput
Pilersuisoq A/S-ip inuussutissanik amerlanaarlugit piniarneqartartunik pisiniarfia atorluarneqartaqaaq, ingammik sapaatikkut igaassat akikitsunnguamik tuniniarneqarsinnaasaramik.
Nanortalimmiut ilaata Sakæus Elisasenip qanittukkut Nuuk aqqusaaramiuk pisiassat akiisa qaffasinnerat annilaajallaatigisimallugu oqarpoq.
- Nanortalimmiuusugut Pilersuisumiit assut pitsaasumik pineqarpugut. Maani suliffissaaleqisoqaqimmat taamatut pineqarsimanngitsuugutta annertoorujussuarmik eqqorneqarsimassagaluarpugut, Sakæus Elisasen oqarpoq.
Nanortalimmi Pilersuisup pisiniarfia ullut tamaasa neqerooruteqartuaanarpoq, sapaatillu tamaasa igaassat akikilleqqinneqartarput.
Sakæus Elisasenip Nuuk aqqusaaramiuk nioqqutissat akisunerujussuannik assut annilaajallassimanerarpoq.
Pilersuisup Nanortalimmi pisiniarfiani inuussutissat nioqqutigineqartut allanut sanilliullugit qanoq akikinnerutiginersut Pilersuisup qullersaqarfianit oqaatigineqarsinnaangikkallarpoq. Nanortalimmi periuseq Aasianni aamma ingerlanneqarsinnaanersoq misissuiffigineqartoq, KNI Pilersuisup paasissutissiisartua Frederik Olsen ilisimatitsivoq.
