Nanortalimmi politiit illuinnarsuummik atuisariaqarsimapput
Angutip 45-nik ukiullip savilersorluni politiit marluk saassussimavai, politiillu illuinnarsuutitik atortariaqarsimavaat, angullu niumigut aallaaneqareernermi kingorna politiinut aatsaat tunniutiinnarsimavoq.
Angut Nanortallup napparsimmavianukaanneqarpoq, Dronning Ingridillu Napparsimmavissuanut kingorna ingerlateqqinneqarluni. Angutip inuunera navianartorsiunngitsoq, politiit nalunaarutigaat.
Angutip tigusarineqarnermi kingorna pinerluttulerinermik inatsimmi §37 naapertorlugu unnerluutigineqarpoq, naallu najuutinngikkaluarluni inatsit tunngaviusoq naapertorlugu aamma killisiorneqarluni, politiit oqarput.
- Unnerluutigineqarnerminut atatillugu angut suli pinngitsuutinnginnerarpoq, pisoq nammineq oqaatsini naapertorlugit eqqaamannginnamiuk. Politiit periarfissaqaleriarunik angut killisiorumaaraat, Tanja Søderlund, unnerluussisussaatitaasuneersoq oqarpoq.
Inuk politiit aallaasersorsimanerannut atatillugu ajoqusersimagaangat suliaq Politimestereqarfimmit misissorneqartarpoq, matumanilu tassa aamma misissuisoqarumaarluni. Taamaaliortoqareerpat suliaq politiinut maalaaruteqartarfimmut ingerlateqqinneqarumaarpoq.
