Nanortalimmi kommunalbestyrelse avissaarpoq
Nanortallip kommunalbestyrelseani Siumup Inuit Ataqatigiillu suleqatigiinnerat ippassaq atorunnaarsinneqarpoq. Marsip 16-ianni innuttaasunik ataatsimiisitsinermi pisut aallaavigalugit Inuit Ataqatigiit suleqatigiinnermik kipititsisuupput.
Innuttaasunik ataatsimiisitsinermi kommunit kattussuunnissaat kisimi oqaluuserisassanngortitaasimavoq, innuttaasulli kommunimit sullinneqarnertik aamma eqqartorusussimavaat, qinikkallu borgmesterilu Kristine Raahauge sakkortuumik uparuarneqarsimasut, radioavisimit paasivarput.
Innuttaasunik ataatsimiisitsisoqareersorlu Inuit Ataqatigiit Siumumik ataatsimeeqateqarnissartik kissaatigisimagaluarpaat, Siumukkormiulli qaammat ataaseq aatsaat qaangiuppat ataatsimiikkusimasut, Inuit Ataqatigiit tusagassiutinut nalunaaruteqarnerminni allapput.
Siumukkullu ataatsimiinnissamik utaqqititsiniarnerat peqqutigalugu Inuit Ataqatigiit suleqatigiinneq atorunnaarsippaat.
Nanortalimmi Inuit Ataqatigiinni siulittaasoq Aqqaluk Petrussen radioaviisimut oqaaseqartinniaraluaratsigu iluatsinngilarput. Aamma borgmesteri Kristine Raahauge Nanortalimmilu Siumup siulittaasua Peter Sonberg suleqatigiinnermik unitsitsineq oqaaseqarfigerusunngilaat.
Siumut Inuit Ataqatigiillu arfineq marlunnik kommunalbestyrelsemi amerlanerussuteqarput, kommunalbestyrelse qulingiluanik katillugu ilaasortaqarluni. Siumumi ilaasortat sisamaapput.
