Nanortalimmi imassaataarupput
Nanortalimmi piniartut isumalluutigilerpaat nunaqarfimmit Narsarmijinit imassanik tikittoqarnissaa.
Qaammatip ataatsip ingerlanerinnaani Brugsen aamma Pilersuisoq timmiarsiutit imassaannik Nanortalimmi nunguutsipput.
- Ulluni makkunani aalisagaqanngilaq aammalu puisit akuttusoorujussuullutik. Taamaammat timmiarujuit isertitsiniutissatut maanna kisiisa isumalluutigaavut. Taamaasiorsinnaanngilagulli imassassaqannginnatta, taama KNRip aallakaatitaanut Nunarput ullumi-mut oqarput piniartut Ludvig Elisassen aamma Herman Stach.
Pisiniarfiit taakku imminnut unammisut juulli sioqqullugu aamma timmiarsiutit imassaannik nunguutsipput maannalu aamma tassa nunguutseqqillutik.
Juulli sioqqullugu piniartut arlallit Alluitsup Paanut imassarsiniarsimapput pisiatilli tassa maanna aamma nunguppaat.
Ajornartorsiut Kalaallit Nunaanni Brugsenip ulluinnarni aqutsisuini eqqartorneqartussanngorpoq tallimanngornermi Nuummi ataatsimiinnermi.
- Inooqataaffigisinnaanngilarput nioqqutissamik pingaarutilimmik pisisartutsinnut neqeroorsinnaajunnaarnerput. Taamaattumik ajornartorsiut taanna qaqilerniarparput, taama Nunarput ullumimut oqarpoq Kalaallit Nunaanni Brugsenimi siulersuisut siulittaasuat Ole Mølgaard Motzfeldt.
