Nanoq Nuup tungaanukarpoq
Mad Bek Nuummeersoq qatanngunnilu maannakkut Nuup Kangerluani Qooqquniipput. Mads Bek nalunngisaminut Erik Palo Jakobsenimut oqarasuaatikkut angallattakkut allappoq Qooqquni illut akornanni nanoq angalaartoq matumullu kukimminik qitsuaasimasoq, Qooqqunilu illunut allanut qanillattortoq.
Tamatuma kingorna Erik Palo Jacobsen Qooqqunukarpoq angallatit raadiuat VHF aallaasillu nassarlugit. Erik Palo Jacobsenip oqarnera malillugu Mads Bek qatanngunnilu ajunngillat.
Sinerissami nakkutilliissut Knud Rasmussen Qooqqut eqqaanniippoq, inuttai taqqamani aalisartut.
- Taakkua ilisimasimanngilaat eqqaminni nanoqartoq. Knud Ramussenip inuttai isumaqatigiissuteqarfigaakka nannumik ujaasininni qanoq pisoqassagaluarpat piareersimaqqullugit.
Nanoq maannakkut Nuup tungaanut nalorusaarpoq, maannakkullu qanittunnguullugu angallammik ingerlarusaarpunga Erik Palo Jacobsen Sermitsiaq.ag-mut ullup qeqqata siorna oqaluttuarpoq.
Erik Palo Jacobsen nannumik pisaqarnissamut akuersissuteqanngilaq, maannakkut piniarnermut nakkutilliisut nannup ingerlaarfianukarput, piniartup piniarnermik akuersissuteqartup nanoq aallaasinnaaniassammagu.
