Nanoq maanna pisarineqareerpoq
Piniartup Anthon Egedep erneratalu Kunuuti Egedep nanoq pisaraat ullaap tungaa Qooqquni illut akornanni angalaartoq. Nanoq Qooqqut paavani naluttoq pisarineqarpoq.
- Siullermik Namminersorlutik Oqartussanut paasiniarpara suli nannutassaqarnersoq. Nanoq tikipparput Pinngortitaleriffimmiut najulereersimagaat, Anthon Egede KNR-imut oqarpoq.
Taanna nannunnissamut akuersissummik peqarpoq nanorlu tassa Qooqqut paavani pisaralugu.
Nanoq maanna biologinit misissuiffigineqarpoq.
- Anthon Egedep pilannerani misissugassanik katersissaagut. Kigutaa ilanngarsiffigissavarput nannup utoqqaassusaa paasiniarlugu. Aamma oqaanit ilanngarsissaagut DNA-mik misissugassatsinnik. Paasiniarparput nanoqatigiit qanoq amerlatiginersut aammalu nanoq qanoq nerisimatiginersoq paasiniarlugu. Orsua aamma misissorniarparput mingutsitsinermik malussarfiusinnaanersoq paasiniarlugu, biologi Malene Simon KNR-imut oqarpoq.
Nannup maanna angallavissani qimarujussuarsimavaa Qooqquni takuneqarami. Nannut maanna sinerissamut ungasissumi sikorsuit akornanni piniarput. Aammagooq imaassinnaavoq suli Nuup eqqaani nanoqartoq.
- Ukioq nanoq angutiviaq Nuup Kangerluani takuneqarpoq naluarpulli taanna maanna sumiinnersoq, Malene Simon oqarpoq.
Anthon Egede nanoq maanna Kalaaliaqqami pilanniarpaa.
- Misissorneqareerpat neqaa tuniniassavara. Amia nammineq tigumiinnassagunarpara, Anthon Egede oqarpoq. Taassuma nannuttani umiatsiaminut ikisimavaa piniarnermi nakkutilliisut biologillu ikiorsiullugit.