Nanoq Knut arnaateqalissaaq

Taavalu maanna nanoq Knut 2007-imi nunarsuarmi tusaamasanngortoq pillugu oqaluttuani nangeqattaartutut ittuni nuannersunnguamik naggataaruteqassaagut. Taamanikkut taanna nanuarannguuvoq arnaarsersimasoq, uumasuusivissuarmilu paarsisoq peqatigalugu alliartortoq, Tysklandimilu tamarmi nuannarineqalersoq.

Maannali Knut inersimasunngulerpoq Tysklandimilu tusagassiuutit ullumikkut allapput aaqqissuussamik aappariilernissaq aallartisalersoq - Knut tassa arnaateqalissaaq!

Nanoq arnaviaq iluanaartoq tassaavoq Gianna, Italiami inuusoq, aviisit ullumi taama allapput.

Gianna marlunnik ukiulik Italiami rockimik erinarsortartoq Gianna Nannini atsiullugu atserneqartoq Berlinimi uumasuusivissuarmi septembarip qeqqani takutinneqassasoq, aviisi Tagesspiegel allappoq.

Imminnullu ilisarisimalernissaminnut piffissaqarluarput. Nannut taakkua ukioqatigiipput marlunnik ukioqarlutik - aatsaalli suli ukiut marluk qaangiuppata kinguaassiuutimikkut inersimasunngussallutik, nannunik paasisimasaqarluartut taama oqaatigaat.