Nanoq arnaviaq Nuup qanittuani ippassaq pisarineqarpoq

Nuup eqqaani Kangerluarsunnguami ippassaq unnulaaraa, tassa nalunaaqutaq arfineq-marlup eqqaani, nannuttoqarpoq. Nannuttoq tassaavoq aalisartoq piniartorlu Lars Mathæussen. Nanoq pisarineqartoq arnaviaavoq, pingasut sisamallu akornanni utoqqaassusilik.
apriilip 11-at 2009 13:16

Lars Mathæussenip nulianilu nanoq avataaniit sivisuumik isiginnaareerlugu aatsaat aallaavaa, unnia kusanaq, isigisaq alutornartorsuaq. Pisarereeramikku Nuummukarput, nanorlu meterinik marlunnik 60 centimeterillu missaanni angissusilik kalaaliaraliaallugu.

Inuppassuit kalaaliaqqamut ussagarput, ilaat assiliiartortut, ilaasa nanoq attoriartoraat.

- Aatsaavissuaq nanuppunga. Misigisaq tupinnaqaaq, tulluussimaaqaangalu, Lars Mathæussen Radioaviisimut ullumi oqarpoq.

Nanoq ippassarli aggorneqarpoq, neqaalu uumasut nakorsaannit ullaaq misissorneqarpoq, trikiineqanngimmallu ullumi tuniniarneqarpoq, alutorineqarunavilluni, kiilumut 200 koruuningajannik akeqarpoq.

Nuup qanittuani nannunik qaqutigut takusoqartarpoq, kingullermillu ataatsikkut marlunnik nannuttoqarpoq ukiut 14-it matuma sorna, tassa 1995-imi apriilip ulluisa aallaqaataanni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq