Nanoq Aasiaat eqqaanni pisarineqarpoq

Nanoq piniartunit marlunnit Qasigiannguaneersunit Aasiaat kangiata tungaani arfininngormat pisarineqarpoq. Piniartut piniarnermut allagartaqaraluarlutik nannussinnaanermut akuersissuteqanngimmata nanoq politiinit arsaarinnissutigineqarpoq.
Allattoq Louise M. Kleemann
marsip 15-at 2010 08:48

(Nutartigaq) Qasigiannguit Politeeqarfiup pisortaa, Karl Vinther, oqarpoq piniartut marluk nannussinnaatitaanatik nannussimasut qanoq pineqassanersut maannakkuugallartoq oqaatigineqarsinnaanngitsoq.

Nannup Nuummut nassiussassartai pappialarsornerit naammassippata isumagissallugit oqaatigaa.

- Piniarnermut Nakkutilliisoq suliamut tunngatillugu qanoq ilioqqissanerput pillugu siunnersuuteqassasoq naatsorsuutigaara, Karl Vinther oqarpoq.

Piniarnermut nakkutilliisoq oqarpoq nannup neqaa misissorneqaqqaassasoq.

- Nannup neqaa trikineqarnersoq Nuummi misissorneqassaaq, tamannalu pereerpat pisortat suliffeqarfiutaannut agguaanneqassalluni, piniarnermut nakkutilliisoq Ole Jeremiassen oqarpoq.

Nannup niaqua amialu Namminersorlutik Oqartussanut tunniunneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq