Nanoq aallaaneqarsimalluni qimaannagaq
Nanoq toqunneqarsimasoq pingasunngormat ulloqeqqata siornagut nassaarineqarpoq. Pilattarlugu paasiniaanikkut paasineqarpoq aallaaneqarnerminit ikeqartoq niualu naffakuulluni.
Uumasunik ilisimatooq Norgep avannaani aviisimut Finnmark Dagbladimut oqarpoq nanoq nassaarineqarami ulloq unnuarlu sivikinnerusumik toqungasimasoq.
- Pisoq imaannaangitsorujussuartut isigaarput, uumasoq eqqissisimatitaq aallaaneqarsimavoq maannalu paasiniaalluta aallartippugut inullu taamaaliorsimasoq nassaariniassallugu, politiit pisortaat Erik Nygaard aviisimut oqarpoq.
Erik Nygaard nannumik pisaqarnerit nalunaarutigineqanngitsoornerannik naammattuugaqanngisaannarsimavoq.
- Inuit imminnut illersorniarlutik aallaannittariaqartarnerat pillugu kalerrinneqartarpugut, tamakkuali oqartussaasunut tamatigut nalunaarutigineqartarlutik. Tassami nannumik aallaannikkaanni tamanna pinngitsoorani nalunaarutigineqartussaavoq, Erik Nygaard aviisimut Finnmark Dagbladimut oqarpoq.
