Nannuttassiissutit ikiliartuaartinneqarput
Aalisarnermut Piniarnermullu Pisortaqarfiup pisortaata Amalie Jessenip tamanna ima nassuiarpaa:
- Aalajangersimasumik pisassiisoqartanngikkallarmat nannuttat ilaatigut amerlavallaartarsimapput, taamaammat nungukkiartuutaanngitsumik pisassiisoqartarnissaa siunertaralugu nannuttassat ikiliartuaartinneqarput, Aalisarnermut Piniarnermullu Pisortaqarfimmi pisortaq Amalie Jessen oqarpoq.
Imminut illersorniarluni nannunik ilaatigut toqutsisoqartariaqartarpoq. Tamanna akuersissummik tunineqarnikut pisarpoq, aappaaguanulli pisassiissutinik ilanngaanermik kinguneqartarani. Periuseq taanna Canadami atorneqartarpoq. Tamanna pillugu Amalie Jessen ima akissuteqarpoq:
- Unioqqutitsinikkut nannumik pisaqartoqarsimappat, pisarineqartoq aappaaguani ilanngaataasarpoq, Canadamili periuserineqartoq malinnianngikkallarparput, toqutsisariaqartarnerit qanoq amerlatiginersut paaseqqaarusukkatsigu, Amalie Jessen oqarpoq.
Ukioq manna pisassiissutigineqartut 135-upput, aappaagulu 130-utinneqassallutik.
