Nannuttassat Greenpeacemut tuniniaruk
Morten Hilmar assiliisartoq, siornatigut tunup avanaarsuarni alapernaarsuisuni Siriusimi alapernaarsuisuusimasoq, Illoqqortoormiut eqqaanni nannut piniartunit pisarineqaratik takornarianut takutissiarineqalernissaannik suliniuteqarpoq.
Nannuttassat allamut tunineqartarnissaannik isuma, Illoqqortoormiuni piniartunit isumaqatigineqartoq Morten Hilmer oqarpoq, isumaqataanerminnut allakkiaq Piniarnermut Naalakkersuisoqarfimmut nassiussimagaat, Morten Hilmar oqarpoq. Suliniut Namminersorlutik Oqartussanut tusarniaassutigineqarpoq.
Nannuttassat allamut tunineqaqqusaanngillat, aamma allamut tunniuteqqusaanngillat. Morten Hilmar pingasoriarluni Illoqqortoormiuniinnermini paasivaa, piniartut isertaat ukiumut 60.000 kroruunit missaannaaniittut. Nannup ataatsiip amiata tunineqarnera 15.000,00 koruuninik akeqarpoq. Piniartup nannutassaanik pisineq 35.000,00 koruuninik akeqarnissaa Morten Hilmarip takorloorpaa.
Erseqqissaatigaa piniartut namminneq piumassusertik tunngavigalugu nannuttassiissutit tunisinnaagaat. Illoqqortoormiuni nannuttassat ukiormanna 35-iupput, aqqaneq marluk pisarineqareersimasut, Piniarnermut Pisortaqarfimmit nalunaarutigineqarpoq.
Tunumi taamatullu Illoqqortoormiut eqqaani nannut kisinneqarnikuusimanngillat.
Morten Hilmar arfininngorpat Illoqqortoormiunukassaaq isumassarsiani pillugu piviusulersaaruumik immiussiartorluni, qaammatip ataatsip missaani tunumiinnissani pilersaarugiaa.
Isumassarsiaq Danmarkimi soqutigineqarluarpoq. Morten Hilmer Danmarks Radiup aliikkutassiatut aallakaatitassiaani Aftenshowet-imi aqagu unnugu pulaartuussaaq.
