Nannut uuliasiorfiliortunut qaninngoorsinnaapput
Nannut uumasut nungutaalersut allattorsimaffiinut ilanngunneqassanersut, USA-mi oqartussaasut ullut qulit tulliuttut ingerlanerini aalajangertussaavaat, nannullu allattorsimaffimmut tassunga ilanngunneqassappata, avatangiisinik illersuiniaqatigiiffiit uuliasioqatigiiffinnik eqqartuussisulersuussiniarlutik pilersaaruteqarput.
Taamaaliornikkut uuliasiorsinnaanissamut pilersaarutit unitsinneqarsinnaassapput.
Uulia tamaani qallorneqarsinnaasoq annertungaatsiartutut nalilerneqarpoq, nappartat 7 milliardit immerneqarsinnaassangatinneqarmata.
Nannut uumasut nungutaalersut allattorsimaffiinut ilanngunneqassanersut ilanngunneqassannginnersulluunniit USA-p præsidentiata George W. Buship aalajangiiffigisariaqaraa eqqartuussiviup sapaatip-akunnerata siuliani aalajangerpaa.
Imartami pineqartumi uuliasiulersinnaanissamut atatillugu aningaasat dollarit 100 millionilikkaat Royal Dutch Shellip atoreerpai.
George W. Bush qaammatit arfineq-pingasut qaangiuppata præsidentiujunnaartussaavoq, uuliasiortoqarsinnaanissaalu præsidentiujunnaarnissani sioqqullugu qulakkeerumagaa, avatangiisinik illersuiniaqatigiit oqaatigaat.