Nannut Svalbardimi nujuillisoorutigineqartut

Norgemiut qeqertaaraanni Svalbardimi najugaqartut takornariallu nannut qaninnguuleraangata qimaatinniarlugit illuinnarsuummik qimaatitsissummik seqqortarput, nannulli tamanna maanna soqutigiunnaarsimavaat.
Allattoq Camilla Dam, Simon Uldum
septembarip 04-at 2014 08:18

Ilinniartut sapaatiummat qeqertamiitillutik nanoq nerisassarsiortoq qimaatinniarlugu 50-eriarlutik seqqortarsimagaluarput, illuaqqamulli qimaaginnartariaqarsimallutik.
 
Nanoq qaninngoortoq qimaatinniarlugu ataasiaannarluni seqqornissaq naliginnaasumik naammattaraluarpoq, Norgemiulli Issittumi misissuisoqarfianni nannunik ilisimatusartut nannut allatut pissusilersortalersimanerat maluginiarsimavaat.

- Nannut naleqqussapallanniallaqqissuupput, taamaammat aamma nannut illuinnarsuutit qimaatitsissutigineqartartut ulorianaateqannginnerat paasisimassajunnarsivaat. Aamma taamatut qimaatitsiniarluni seqqortoqartarnera piffissap sivisuup ingerlanerani sungiutiinnaratarsinnaavaat.
 
- Nannut sapinngisamik sukkanerpaamik qimaatinniarnissaat pingaaruteqarpoq, taamaaliunngikkaannimi periarfissarsiupallassinnaasarmat, nannunik ilisimatusartoq Jon Aars norgemiut tv-qarfiannut NRK-mut taama oqarpoq.

Pinngortitamut naleqquttumik inuuneq killeqalerunarpoq
Svalbardimi ileqquuvoq nannut pinnatik inuit qimaguttassasut. Nannulli ilikkallaqqissut maanna ajornartorsiutaalerput.
 
- Taamattoqarnera nuannarinngilarput. Inuit nannullu eqqissillutik maaneqatigiinnissaat kissaatigigaluaqaarput, arlaatigulli ajortumik pisoqarsinnaanera ernumanarpoq, Christian Svarstad, qeqertaaqqani guvernøriusoq oqarpoq.
 
Inuit qimagutipallannissamut pilersaarusiortarnissaannik kaammattorpai, taamaaliornikkut nannut toquttariaqarsinnaanerat pinaveersaartinniarlugu.

[View the story "Svalbard" on Storify]

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk