Nannut sanigoriartorlutillu sanngiilliartuinnarput

Hudsonip Kangerliumarngani nannut arnavissat ukiut 30-t matuma siorna kilot 300-t pallillugit oqimaassuseqartaraluartut, maanna agguaqatigiissillugu kilonik 65-inik oqileriarsimapput. Tamanna Canadami nannunik misissuisartut, Norgemi nannut pillugit ataatsimeersuarnermi oqaatigaat. Alaskamilu nannut nanoqatiminnik neriniartalersimasut taavani nannunik misissuisartut oqaatigalugu. Norgemi ataatsimeersuarnermi Danmarkimeersut saniatigut naalagaaffiit allat sisamat peqataatitaqarput. Ataatsimeersuarnermilu naggasiullugu nannut ulorianartorsiortinneqarnerat, silaanaap kiatsikkiartuinnarneranik pissuteqartutut nalilerneqarpoq. Taamatut naliliineq nannut pillugit immikkut ilisimasallip Norgemiup, Dag Volgravenip nuannaarutigaa.

Dag Volgraven oqarpoq, naalagaaffiit issittumi nanoqarfiit tallimat isumaqatigiillutik taamatut avammut nalunaarsinnaanerat sakkortuutut oqaatigineqarsinnaasoq malunnaateqarluarsinnaasorlu.

Taamalu ersaritsigisumik silaannaap kiatsikkiartornerata nannunut sunniuteqarneranik nalunaaruteqarneq neriuutigisinnaasaminilluunniit pitsaanerusoq oqaatigalugu. Nannummi atukkatik nutaat pissutigalugit paatsiveerutilernerat akiorniassagaanni, taava silap kiatsikkiartuinnarnera akiorneqartariaqarpoq,

nannummi sikumi piniarsinnaanertik pinngitsoorsinnaanngilaat, Norgemi Issittoq pillugu Ilisimatusarfimmi atorfilik, Dag Volgraven oqarpoq.

Tromsømi ataatsimeersuarnermi peqataasunit naggasiutaasumik naliliinermik, nunarsuatsinni naalakkersuisut Københavnimi ataatsimeersualerunik tatisimaneqarlutik eqqaamassagaat neriuutigineqarpoq.