Nannut saarngi napiasuunngorsinnaapput

Nannut timimikkut akuutissanik ulorianartunik akoqarpallaalernerat nappaatinut akiuussinnaassusaannut sunniuteqartoq, Videnskab.dk-mi allaaserineqarpoq.

- Nannut kinguaassiuutaat milliartortut uppernarsineqareerpoq, taamaattumik kinguaassiorsinnaanerat innarlerneqariaannaalluni. Aamma saarngisa nukittussusaat sakkukilliartorpoq napiasuunngornerannillu kinguneqariaannaalluni, Danmarkimi Avatangiisit pillugit misissuisarfimmi DMU-mi ilisimatooq Rune Dietz Videnskab.dk-mut oqarpoq.

Naasorissaanerit, sullinernik nungusaanerit kiisalu plastikkiliornerit akuutissanik ulorianartunik pinngortitsisarput, akuutissallu taakku nunarsuarmi sumi tamaneersut issittumi katersuuttarput uumasullu nerisaannut akuulersarlutik.

Akuutissat ulorianartut amerliartuinnartut inunnut qanoq kinguneqarsinnaanerat Rune Dietzip ilisimatusaqataasalu misissuinerminni samminngilaat. Taamaattoq inuiaqatigiit Inuit tigunnik tartunik orsunik mattannillu nerisarnerat Rune Dietzip kaammattuutigiumanngilaa.

Ilisimatuut nannunik misissuinerat Rune Dietzip doktorinngussutissaminut misilitsissutaani saqqummiunneqartunut ilaavoq.