Alaska-p imartaata avannarpasissuani Issittup sikua aakkiartuinnarmat nannut sikumi piaqqissaarlutik nunavimmi piaqqiartortalersimapput. Alaskami US Geological Survey-imi ilisimatuut taama nalunaaruteqarput.
Nannut sikumi piaqqisartut 1985-ip 1994-illu akornanni 62 procentiusimariarlutik, 1998-ip 2004-llu akornanni 37 procentiinnanngorsimapput.
- Nannut aasaanerani nerisassarsiortartut immap sikunissaa maanna sivisunerusumik utaqqisariaqartalersimavaat. Pissutsit ukiut qulit matuma siornatigut allaanerusimapput, immallu sikuniartarnera qaammammik ataatsimik sivitsorsimalluni. Nunavimmi apissiliornissartik taamaasillutik utaqqimaaqqaartalersimavaat, US Geological Survey-imi ilisimatooq Steve Amstrup taama oqarpoq.
Siku nikerarpallaartoq nannut apissiliorfigerusunneq ajorpaat, nunavimmullu maanna ingerlaarnerusalersimallutik. Sikiuitsup sikua septembarip naajartulerani oktobarillu qaammataata aallartilaarnerani sinerissamiit 200 kilometerit tikillugit maanna ungasitsigisumiittalersimavoq, siornatigut sineriak angullugu sikuusarsimagaluarluni.
Nannut qaammataasatigut malinnaavigineqarsimapput, sumilu apissiliortarnersut tassuunatigut paasineqarsimalluni.
