Nannut nunaqarfimmut isernialeraluarput
![](/sites/default/files/styles/image_934x467/public/article_images/isbjorne_i_qeqertarsuatsiaat_foto_josef_berglund_630.jpg?itok=WKwBsndn)
Qeqertarsuatsiarmiut digitalinik assiliivinnik ujammilerlutik suaartarlutik nannut nunaqarfimminnut isernialeraluartut ungoorpaat. Nannut ippassaq Pilersuisup pisiniarfiata tungaanut aallaraluarput. Ullorli naanngitsoq puisitorput kingornalu piniarnermik nakkutilliisunit ungoorneqarlutik qimagutitinneqarlutik.
- Qaqqamiit ammut Pilersuisup pisiniarfiata tungaanut aallaraluarput. Taava inuit suaartarlutik ungoorpaat nunaqarfimmiit qimagutitillugit, KNR-ip Qeqertarsuatsiaani ilanngutassiortua Hans Henrik Berthelsen taama oqaluttuarpoq.
Nannulli taakku kaannguatsiartut Pilersuisup nioqqutissaataani ilaangiinngitsoorput, taamaattorli Nuup nunaqarfia kujalleq tarritsaaliorlugu ullorlu naanngitsoq nunaqarfiup avatinnguani qeqertami puisitorput. Piniarnermik nakkutilliisut aggersarneqarput taakkulu ikiorsiullugit nannut ungoorneqarput.
- Qoorortuumik eqqarlutik kiisalu ajunaalernermi kalerrisaarutinik ungooruserlutik ungoorpaat. Maanna Qeqertarsuatsiaat eqqaaniikkunnaarput avannamullu nalullutik ingerlaarlutik. Imaassinnaavoq ullut arlaqanngitsut qaangiuppata Nuup eqqaanut pisut, Hans Henrik Berthelsen oqarpoq.