Nannut marluk toquinnartariaqarsimapput
Piaqqat anaanaallu siullermik sapaatiummat takuneqaqqaarput, qimaatinniarneqaramik anaanaat kisimi qimaasimavoq sikulu angallaviusinnaanngimmat politiit piaqqat aallaaginnarpaat.
Ittoqqortoormiimi politiit pisortaat, Michael Poulsen oqarpoq aallaaneqarsimanngikkaluarunik perlerlutik toqusimassagaluartut.
Nannut Ittaajimmiunut ulorianarsinnaasutut nalilerneqarmata aallaanissaannut politiit Piniarnermut Aalisarnermullu naalakkersuisoqarfimmut qinnuteqarsimapput, akuerineqarlutik.
Nannut piaraasa marluk pisarineqarnerisigut, Kalaallit Nunaata avannaani, kitaani, kujataani maannalu Tunumi qaammatip ingerlanerinnaani nannut katillugit tallimat pisarineqarput.