Nannut marluk nalullutik Islandimut pisut kiffiarneqareerput
Nannut marluk Tunumeersut nutaarsiassaqartitsivinnit alapernaanneqaqalutik Islandimut juunip qaammataani sapaatip akunnerisa marlussuit ingerlaneranni pisut, ammarlugit misissorneqarnerisa inerneri Islandimi illoqarfimmi Akureyrimi aanaveersaasartut marluk maanna saqqummiuppaat.
Allattoq Louise M. Kleemann
novembarip 20-at 2008 10:09
Nanoq angineq angutiviaavoq, utoqqaangaatsiarpoq, 22-t missaannik ukioqarunarluni, nannummi pinngortitami uumasuusut qaqutigut ukiut 25-t angusarpaat.
Nannup aappaa arnaviaavoq, nukeerussimaqalunilu Islandimut pilluni. Taanna aqqaneq-marlunnik 13-inilluunniit ukioqassangatinneqarpoq. Nukeerussimangaarami nalunaaquttap akunnerini 24-ni nunamiinnermini nerisinnaasimanngilaq, naak timmissat ulluinik mannippassualinnik nunniffimmini peqaraluartoq.
Nannut oqartussaasunit aallaaneqartariaqarsimapput, maannalu kiffiarneqareerput, nannullu nassaarineqarfiisa eqqaanni katersugaasivinni saqqummersinneqassapput. Islandimi aviisimi Morgunbladidimi taama allaaserinnittoqarpoq.
