Nannut avataarsuanit nakkutigineqartalersut
Ilisimatuut marluk Seth Stapleton aamma Todd Atwood, United States Geological Survey, Alaskameersut avataarsuanit assilisanik misissuinerminni qeqertami Canadap avannarpasinnerusortaani Hudsonip kangerliumarngata avannaatungaaniittumi nanoqassusaanik misissuisimapput.
Ilisimatuulli oqaatigaat avataarsuanit assilissat atuinnarnagit aamma qulimiguulimmit nunamiillumi assilisat atorsimallugit. Avataarsuanit assilisat erseqqarissumik takutippaat Hudson kangerliumarngata avannaani qeqertami tassani nannut 90-iusimasut paasisimavaat.
Qaammataasamit assilisat issittumi uumasunik nakkutilliinermut naleqqulluartut
Kisitsinermi nunami ingerlanneqartumi nannut hunnorujungajaanniittut kisinneqarsimapput. Avataarsuanillu assilisat atorlugit issittumi uumasut nakkutigineqalersinnaasut ilisimatuut misissuinerminni nalililerpaat.
Periaaseq taanna nutaaq issittumi uumasut silap pissusiata allanngoriartorneranit qanoq sunnerneqarnerannik nakkutiginnilluarsinnaanermut periarfissiivoq. Ilisimatuulli massakkut nunarsuarmi allami issittumiinngitsumi avataarsuanit assiliillutik uumasunik misissuinissartik aallartinnialerpaat.
