Nannut amiinik EU-mut eqqusseqqusiunnaarneq naggueqatitsinnut eqquivoq
Tammajuitsussarsiniarlutik piniartartut tamaani piniartarunnaarnissaat Nunavut Tunngavimmit aarleqqutigineqarpoq,naggueqatitsinnullu kingunerlutsitsisinnaanissaa aammattaaq aarleqqutigineqalerluni.
Nannut amiinik EU-mut eqqusseqqusiunnaarneq pinngitsoortinniarlugu Canadap naalakkersuisui iliuuseqanngippallaarsimanerarlugit Nunanut Tunngaviup vicepræsidentia Raymond Ningeocheak CBC-mut oqarpoq.
Nunavummi Canadamilu biologit innersuussuteqarnerisigut nannut amiinik EU-mut eqqusseqqusiunnaartoqarpoq, Canadalli avatangiisinut ministeriata John Prenticep oqaatigaa eqqusseqqusiunnaarneq Canadap sinneranut atuunnavianngitsoq, nunalli immikkoortuinut marlunnut atuutissasoq.
Prenticep ilanngullugu oqaatigaa eqqusseqqusiunnaarniarnerup Canadap sinneranut atuutsinneqannginnera EU-mit tatiginninnertut nalilerneqartariaqartoq.
Canadami naalakkersuisut Winnipegimi januaarip qaammataani ataatsimiilerpatta nannunniartarnermut periutsit oqaluuserineqassapput, pilersaarullu pitsaasutut nalilerneqassappat, nannut amiinik EU-mut eqqusseqqusiunnaarnerup atorunnaartinneqarnissaa neriuutigineqarpoq.
