Nannut Alaskamiittut nunaat ilaneqarpoq

Nannut Alaskamiittut nunaat ilaneqalerpoq, nuna eqqissisimatitaq isorartunerulersinniarneqalerami. Uuliasiortut nunami pineqartumi qillerisinnaajunnaarsitaassapput. Tuluit nutaarsiassaqartitsiviat Reuters taama allaaserinnippoq.
Allattoq Louise M. Kleemann
oktobarip 09-at 2008 10:16

USA-mi naalagaaffimmi pissutsinut ministereqarfik avatangiisinik illersuiniaqatigiinnik ataasinngormat isumaqatigiissusiorpoq.

2010-mi juunip 30-aatinnagu nunat eqqissisimatitat sumiinnissaat aalajangiiffigineqarsimassasoq isumaqatigiissutigineqarpoq.

Nannut uumasut nungutaaratarsinnaasut allattorsimaffiinut USA-p naalagaaffimmi pissutsinut ministeriata Dirk Kempthorne-p siorna ilannguppaa, nannulli uumaffissaannik pilersitsinani.

Uumasut assigiinngitsut sapinngisamik amerlasuujunissaat anguniarlugu ingerlatsiviup eqqartuussisuserisua Kassie Siegel oqarpoq, tamanna kukkunerusoq.

- Uumasut illersorneqaannaratik aamma uumaffissaqartaqariaqarput, Kassie Siegel Reutersimut oqarpoq.

Nunarsuarmi silap kiatsikkiartornera nannunut aarlerinartorsiortitsiinnarani uuliasiortut nannunut aamma aarlerinartorsiortitsisut taassuma aamma oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq