Nannut 130-it ukiormanna pisarineqarsinnaapput
Imminut illersorniarluni nannuttarineqartartunut tunngatillugu qassit pisarineqarnersut Aalisarnermut, Piniarnermut Nunalerinermullu Aqutsisoqarfiup nalunaarsortarpai. Unioqqutitsisumilli nannuttarineqartartut inatsisit naapertorlugit ukiup tulliani ilanngaatigineqartussaapput, taamaalilluni 2008-mi unioqqutitsisumik nannuttarineqartut 2009-mi pisassanut ilanngaatigineqassapput.
Taamaalilluni Tunumi Kujataanilu 2009-mut pisassiissutini 54-iusuni, tallimat 2008-mi unioqqutitsilluni pisarineqartut ilanngaatigineqassapput. Avannaata Imaani, Baffin Bugtimi aamma Ikersuaq Davisimi, Davis Strædemi 2009-mi 70-it nannuttassiissutigineqarput. Tamaanili 2008-mi pisassiissutit ataatsimik sipporneqarsimammata, taanna 2009-mi pisassanut ilanngaataassaaq. Aammattaaq Qaanaap avannaani Ikersuarmi 2009-mi arfinilinnik nannuttassiisoqarpoq.