Nannup tusaamasap Knutip isertitai pilerngunneqalerput

Berlinimi uumasuusivissuarmi isertitat pillugit pilernguttoqalerpoq. Berlinimi eqqartuussisut aalajangertussanngorpaat nannup tusaamasap Knutip aningaasarpassuit isertitai, Neumünsterip uumasuusivianit piumaneqalersut, qanoq pineqassanersut.
maajip 19-at 2009 12:33

Knut 2007-imi nunarsuaq tamakkerlugu tusaamaneqalerpoq, arnaata soqutiginngimmagu uumasunik paarsisut milutsitarilermassuk. Ukiorlu taanna Berlinimi uumasuusivissuarmut pulaartut 30 procentinik amerleriarput, aningaasanngorlugu Knut 40 million korooninik uumasuusivissuarmut iluanaartitsivoq.

Maannali Neumünsterip uumasuusivianit oqaatigineqarpoq aningaasarpassuit Berlinimi uumasuusivissuup susassarinngikkai.

Knutip angutaa Lars, Berlinimi uumasuusivissuarmut atukkiunneqarmat isumaqatigiissutaavoq piaqqititsippat piaraa siulleq Neumünsterimi uumasuusiviup pissagaa.

Knutip aningaasannanniutigineqalernera Berlinimi uumasuusivissuarmit akueriuminaatsinneqarpoq, taarsiulugulu Neumünsterimi uumasuusivik isarukitsunik marlunnik neqeroorfigineqarluni.

Berlinilli uumasuusivissuata neqeroorutaa Neumünsterimi uumasuusiviup pisortaata akueriumanngilluinnarpaa.

Naak Knut maanna inersimasorsuanngoraluarluni mikigallarnermisulli suli soqutigineqartigalunilu nuannarineqartigaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq