Nannunit tunisassiat unitsikkallarpaat
Tamatumunnga pissutaavoq, nannut uumaffigisaminni piuinnarsinnaanerata kinguneqapilussinnaanera, Orpippassuaqarnermut Pinngortitamullu nakkutilliisoqarfik nittartakkamini taama allannerarlugu Sermitsiaq nittartakkamini allappoq.
Orpippassuaqarnermut Pinngortitamullu nakkutilliisoqarfik pineqartoq pillugu EU-kommissionimut nalunaaruteqarpoq, taamaalillunilu EU tamakkerlugu atuuttumik eqqussisinnaanermik unitsitsigallarneq atuutsilersinneqarluni. Taamaalilluni nannunit tunisassianik nunatsinneersunik iluanaarniutigalugu nioqqutissianik, soorlu tunissutissanik imaluunniit nannut amiinik qitulisagassanik nunatsinniit EU-mut nassiussisoqarsinnaajunnaarpoq.
Taamaattorli inuit nunatsinni najugaqartut Danmarkimut EU-mullu angalanerminni nannunit pinnersaasianik, CITES-imit akuersissummik peqqaanngikkaluarlutik nassataqarsinnaasut, Sermitsiami allaaserinnittoqarpoq.
Nunatsinni naalakkersuisut avammut tunisassianik nannuneersunik akuersissuteqartarneq unitsinniarlugu ualilluinnaraa aalajangiuppaat. Taamatut inerteqquteqarneq aaqqiinerugallassaaq apriilillu aallaqqaataanit atuutilissalluni.
