Nannunit pisunit tunisassioqqusinnginneq takunngitsuusaarneqartoq
Avammut tunisaqartarnerup unitsinneqarallarnissaa apriilip ulluisa aallaqqaataanit atuutilissaaq. Danmarkimi orpipassuaqarnermut Pinngortitamullu nakkutilliisoqafiup nannunit pisunit tunisassianik Kalallit Nunaanneersunit Danmarkimut EU-mullu eqqussisinnaanermut akuersissutinik CITES-nik tunniussisarnini unitsippaa ippassaq tallimanngornermi.
Nannunit pisunit tunisassasiorneq soorlu pinnersaasianik nannullu amiinik Kalaallit Nunaanninngaaneersunik EU-mi tunisassiorsinnaaneq ingerlanneqarsinnaajunnaassaaq.
Nannunit pisunit tunisassiornerup innersuussutigineqannginera Danmarkimi Orpippassuaqarnermut Pinngortitamullu nakkutilliisoqarfimmit Namminersornerullutillu Oqartussanit qangali ilisimasimaneqarpoq, tamanna Pinngortitaleriffiup nalunaarusiaani siorna decemberip qaammataani saqqummersinneqartumi takuneqarsinnaasimavoq, uumasut pillugit ilisimasalik biolog Thor Hjarsen Sermitsiap nittartargaani atuartartut allafigisartaagaani ilaatigut taamatut allappoq. Uumasut piniarneqartartut ikiliartornerat ilisimatuussutsikkut suliaqartunit ilisimaarineqartoq, Danmarkimi Orpipassuaqarnermut Pinngortitamullu Nakkutilliisoqarfiup ukiut arlallit nalunngissimavaa ilisimaaralugulu, taamattorli Cites-imik akuersissutinik tunioraanniinnarluni, Thor Hjarsen allappoq. Qilalukkanit aavernit, tikaagullinnit nannunillu pisunit avammut tunisassiorneq akuersissutigineqartarsimavoq, uumasut ikiliartornerannik takussutissat takunngitsuusaarlugit, Thor Hjarsen sermitsiami atuartartut allattafianni allappoq. Nannut pillugit ilisimatuussutsikkut misissuinerit nalilerneqarnerat Pinngortitaleriffiup decemberip qaammataani suliarai. Naliliineq taanna aallavigalugu Danmarkimi Orpipassuaqarnermut Pinngortitamullu Nakkutilliisoqarfiup tunisassiornerup untsikkallarneqarnissaanik piumasaqarpoq. Takussutissaq taamaattoq assortorneqarsinnaanngilaq. Pinngortitaleriffik allappoq, nannunit pisunit tunisassiorneq innersuussutigineqarsinnaanngitsoq, nungusaataanngitsumik piniarneq ingerlanneqanngimmat, Thor Hjarsen allappoq.
