Nanna tusilarlunilu siusinaartumik soraarnerussutisiaqarpoq - suliffissarserusullunili

39-nik ukiulik Nanna Broberg inunnguutsiminik tusilartuulluni. Uinilu sisamanik qitornaqarput. 

Meeqqat atuarfianni sivikitsumik atuartuusimavoq, Sisimiunilu tusilartunut atuarfiusimasumi tamatuma kingorna atuartuusimalluni.

Siusinaartumik maanna soraarnerussutisiaqarpoq, suliffissarsisinnaannginninilu uggoraa. Namminermi misigisimavoq allatuulli sapernani sulisinnaalluni.

- Tusilartuunera oqalussinnaannginneralu akornutituaapput, Nannap uia Ungaaq Tobiassen oqarpoq.

Uiata tusilartut ussersuutaat piginnaasaqarfigilluarpai, ilaqutariiullutillu tusilartut ussersuutaat atorlugit attaveqaqatigiittarput. Nannali angerlarsimaffimmik avataani inummut allamut tusilartut ussersuutaannik piginnaasaqanngitsumut atassuteqarniapiloortarpoq. Tamanna ulluinnarsiutigigini ussersorluni nassuiaavoq.

- Nammineerluni e-mailikkut saaffiginnikkaangami qallunaatut allattarpoq. Taamaalioraangamili oqaatsit ataasiakkaat kukkuneqartaramik allatai kommunimi sulisunit paatsoorneqartarput, Ungaaq Tobiassen oqarpoq.

Pilersuisumi sulisuusimasoq

Nanna Pilersuisumi ulluuneranilu paaqqinnittarfinni sulinikuuvoq. Siusinaartumik 2003-mi soraarnerussutisiaqalerpoq.

- Sulitilluni oqarfigitissimavoq sulisinnaanngimmat siusinaartumik soraarnerussutisiaqalertariaqartoq. Nuummut nuutsinnani taama oqarfigitissimavaoq. Siusinaartumik soraarnerussutisiaqalertariaqartoq kommunip ilisimatissimavaa, Ungaaq Tobiasssen oqarpoq. 

Nannap tamanna ajuallaatigaa.

Nukarlequtaat suli meeraaqqerivimmiittalinngilaq. Nukarlequtaat pingatsiipajaareerpat Nanna sulilerusuppoq.

Nunatsinni tamarmi ajornartorsiutaaqisoq 

Nannap ajornartorsiutai nunatsinni tusilartut kattuffiata siulittaasuata, Lisa Nielsenip, ilisarai. 

Nunatsinnimi tusilartut oqartussanut allanullu saaffiginnikkaangamik oqaatigniakkaminnik paasinnissinnaasut amigaatigisarpaat.

- Tamanna tusilartut nammineq suliffissarsioraangamik ajornartorsiutaasaqaaq. Amerlanerpaartaasali ilaquttatik nutserisuusinnaasut allatigulluunniit ikiuusinnaasut soorunami ilagisarpaat, Lisa Nielsen oqarpoq.

Tusilartulli nakorsiarniartillutik kommunimulluunniit saaffiginninniartillutik nutserisoqarnissartik pisariaqartittarpaat. Nunatsinni tusilartunut siunnersorteqannginneq ajornartorsiutaasoq, Lisa Nielsenip erseqissarpaa.

Tusilartunut siunnersorti tusilartoq kutsiornermi qanoq iliussanersoq nassuiaasartuusinnaavoq.

- Tusilartunut siunnersorti kommunimi, politeeqarfimmi nakorsiarnermilu iluaqutaasinnaavoq, siulittaasoq oqarpoq.

Innarluutillit illersuisuat, Tilioq, tusilartunit nakorsiarnermi kommunimiinnermiluunniit nutserisussaqartannginnertik pillugu saaffiginissuterpassuarnik aamma apuussivigineqartarpoq. 

Qanoruumi ilanngutassiaq takuuk: