Namminiilivissagutta nunaqarfiit ikinnerusariaqarput

Qanorluunniit ilioraluaraanni, aningaasarsiornikkut namminersulivissagutta, taava inuit amerlanerusut tunisassiornikkut tapertaaqatasariaqarput, Henrik Leth oqarpoq.

Nalunaarusiaq, "Namminersorneq, suliassarujussuaq ajornanngilarli",GA-p Nuummi allaffeqarfiani ullaap tungaa saqqumiunneqarpoq.

3,8 milliardit Danmarkimiit manna pisartakkavut qanoq ililluta nammineerluta tarsersinnaanerigut, nalunaarusiami sammineqarput.

Henrik Leth oqarpoq, miliardilikkaanik isaatitisilernissaq ilaatigut anguneqarsinnaasoq, inuit suliffissalinnut nuutsinnerisigut.

Kisianni aamma 3,8 milliardit koruuninik nunarput isertitaqarnerulissappat,

politikerit piumassuseqarnissaat pisariaqarpoq.

- Inuit inuiaqatigiit aningaasaataannik atuisuinnaajunnaarsillugit nuutsinneqarnissaat isumaasariaqarpoq, taamaalillutik aamma inuiaqatigiinnut aningaasalersueqataalerniassammata. Aningaasarsiorneq eqqarsaatigalugu tamanna pisariaqarpoq, aammali inuiaqatigiit ingerlalluassappata inuit amerlanerusut ataatsimoortariaqarmata, Henrik Leth oqarpoq.

Tassalu inuit nunaqarfinniit illoqarfinnut anginerusunut nuunnissaannut aningaasat kisimik tunngavilersuutaassanngitsut tikkuarpaa.

- Aamma inuiaqatigiit qeqqatigut avissimajuassanersut uatsinnut aperisariaqarpugut. Tassami ineriartupiloortunik angisuunik illoqarfeqarpugut, inuiaqatigiillu sinnerini immaqa allaat ineriartortoqaraniluunniit, Henrik Leth oqarpoq.

Tassalu nunaqarfiit inukitsut ikilisartariaqartut sulisitsut isumaqarput.

Nalunaarusiaq naapertorlugu taamaaliorneq inuiatigiinnut aallaqqaammut aningaasartornassaaq, siunissarli ungasinnerusoq isigalugu Nunatta Karsianut isaatitsissutaalissalluni.

Taavalu aamma Henrik Lethip oqarneratut illoqarfinnut nuuttunut inuuniarneq pitsaanerulissaaq.

- Peqqinnissaqarfiup illoqafinni tunniussinnaasai ilinniarnikkullu illoqarfinni periarfissat Nunaqarfinni pigineqanngillat. Taamaammat tamakkua qissimigaarlugit, inuiaqatigiinnut atugassat naligiinnerusumik agguarneqartalernissaat anguniartariaqarparput, sulisitsisut peqatigiiffianni pisortaq, Henrik Leth oqarpoq.

Nalunaarusiaq, "Namminersorneq, suliassarujussuaq ajornanngilarli", siunersuisartunit Niras Greenlandimit suliarineqarpoq.