Namminersulerusunneq pisussaaffiliinerusoraa
Namminersulerusulluta kissaateqarnerput pisinnaatitaaffinnik taamatullu aamma pisussaaffinnik nassataqartussaavoq, Inuit Ataqatigiit siulittaasuat Kuupik Kleist qimaasut pillugit oqallinnermi tusagassiutinut nalunaarummini taama allappoq.
Naalakkersuisut siulittaasuata inissaaleqinermik patsiseqarniarnera illua’tungilerlugu Kuupik Kleist ilaatigut ima allappoq:
- Nunatsinni ajornartorsiuteqarnerput allanik ikiusinnaannginnitsinnut patsisigisinnaanngilarput. Aamma illoqarfiit ilaanni inissaaleqisoqarnera utoqqatsissutiginiarneqarsinnaanngilaq – ilami nunatsinni illoqarfiit ilaat ima inukkilliartortigipput allaat inissianik illunik isateriffiulerlutik.
Qimaasunik qassinik tikittoqarsinnaanera Kuupik Kleistip allaaseraa:
- Soorunami qimaasut qassit inuiaqatigiinni kalallinut akuliutinneqarsinnaassusiat killeqartorujussuussaaq – ataasiakkaannguit kisimik qimaasutut isigineqartussat pineqartussallu nunatsinnut tikittarsinnaanissaat ilimagisariaqarpoq.
Qimaasullu qanoq pineqartariaqarneri Danmarkimi pissutsinut assersuullugu ima naggasiivoq:
- Danmarkimut qimaasimasut ukiorpassuarni katersorneqarlutik ulloq manna tikillugu ilaatigut mattusimaneqartarput. Nunatsinni qimaasunik inissiisalissagutta taamatut mattusimaneqartarnissaat kissaatiginassanngeqaaq. Ataatsimut isigalugu inuiannut allanut ammasuunerput inuiaqatigiittut ilisarnaatigitinneqartartoq tulluussimaarutissaavoq – aamma timitaqartinneqartariaqarpoq.