Namminersulernissarput suleqatigiissutigineqalerpoq
Nunatta namminersornerunerata oqaluttuarisaanerani ullumi nutaamik alloriartoqarpoq, nunatsinni partiit kattuffiillu suleqatigiillutik nunatta namminersulivinnissaa pillugu suliniaqatigiiffissaminnik, ullumi ulloq namminersornerulernitsinnut atsioqataaffiusimasoq maajip ulluisa aallaqqaataat eqqorlugu, pilersitsimmata. Namminersornerulernissatsinnik sulissuteqarsimasut pingajoqqatut ilisimasatta, Jonathan Motzfeldtip Moses Olsenillu pingajuat Lars-Emil Johansen namminersulivinnissarput pillugu suliniaqatigiiffissap ”Inussuk”-p atsioqatigiissutigineqarnera sioqqutilaarlugu ima ilaatigut oqalugiarpoq:
- Ullumikkorpiaq silarsuarmioqaterpassuagut aqqusinerni illoqannginnersanilu katersuupput takutinniarlugu silarsuarmi inuuneq allanngortinneqarsinnaasoq. Takutinniarlugu nammaqatigiinneq puigugaasimanngitsoq. Takutinniarlugu piginnaatitaaffiit illersornissaat imminut akilersinnaasoq. Takutinniarlugu silarsuaq inuuffigisarput pitsaanerulersinneqarsinnaasoq. Aamma maani nunatsini taamaappoq. Kiffaanngissuseq qiteralugu ullumikkut katersuuppugut. Katersuuppugut nunatta namminersulernissaa anguniarumallugu. Katersuuppugut namminersulernissarput ataatsimoorluta sulissutigilerumallutigu. Katersuuppugut suleqatigiiffik nutaaq pilersikkumallutigu. Suleqatigiiffik nunatta namminersulernissaanik suleqatigiiffissarput. Katersuuppugut silarsuarmioqatitsinnut oqariartuutiginiarlugu nunasiaasimanerup ullui maanna naasariaqalersut. Katersuuppugut nunarput nunasiaasimanerup kingunipiluinik aniguisinniarumallugu. Sivisuallaartumik naammagiinnarsimavarput nunatsinnut ilaannakortumik oqartussaatitaanerput, Lars-Emil Johansen oqarpoq.
Namminersulivinnissaq pillugu atsioqatigiipput, partiit Siumut sinnerlugu Hans Enoksen, Kattusseqatigiit Partiaat sinnerlugu Anthon Frederiksen, kattuffinni atsioqataapput SIK sinnerlugu Jess G. Berthelsen, peqatigiiffik Nammineq sinnerlugu Vittus Jerimiassen, Sorlak sinnerlugu Britta N Johansen, NUSUKA sinnerlugu Gerth B Lynge, KIK sinnerlugu Salomine Nielsen kiisalu DNAG sinnerlugu Lars-Emil Johansen.
