Namminersulernissaq piareersarluaqqaartariaqarpoq

Kalaallit Nunaat namminersulertariaqarpoq, namminersulernissamullu piareersimasariaqarluni, Århusip ilisimatusarfiani inatsisilerituunngorniartoq nunatsinneersoq Ulrik Blidorf, taama isumaqarpoq.

Silarsuarmut ammaassiartorneq ilutigalugu inuiaqatigiit piorsarsimasut namminersortuusariaqartut, tamannali pissappat kalaallit inuusuttut ilinniagaqarnissamut piumassuseqarnerusariaqartut Ulrik Blidorf Danmarksradiomi P1-imi apersorneqarluni oqarpoq.

- Inuiaqatigiinni aningaasarsiornermik aqutsineq siullermik pitsanngorsaqqaartariaqarpoq. Tulliattut ingerlateriikkanik iluamik aqutsisinnaaleqqaarani, ingammik meeqqanut inuusuttuaqqanullu sullissineq eqqarsaatigalugu nammininersulernissamut alloriaqqissagaanni iluaqutaanavianngilaq, nunatta iluanaarutissai pingaarnerpaat tassaammata innuttaasut, Ulrik Blidorf oqarpoq.

Nunatsinni meerarpassuit sutigut tamatigut sumiginnagaareerlutik imaluunniit perlilerlutik suli innartassappata namminersulernissamut piareernavianngitsugut, Blidorf uparuaavoq.

Nunatsinni ineriartornermut qinikkat inatsisiliortut partiit inuussutissarsiornerlu aqutsisussaangaluartut, siunnersuisoqarneralli amigaateqarpallaaqimmat taamaattoqanngitsoq Ulrik Blidorf isumaqarpoq.

- Amigartumik siunnersorneqarneq assigiinngitsunik peqquteqarsinnaavoq, taamaattumik qinikkat siunnersuisoqarnerat annertuumik pitsanngorsaavigineqartariaqarpoq. Siunnersortit pitsaanerpaat pissarsiarineqaqqaartariaqarput, tamanna ajornarpat siunnersortissanik pitsaasunik ilinniartitsisoqartariaqarpoq, tamannaana Kalaallit Nunaanni pikkoriffigineqanngippallaartoq, Ulrik Blidorf Århusip ilisimatusarfiani Inatsisilerituunngorniartoq, Danmarksradiomi P1-imi ullumi apersorneqarluni taama oqarpoq. Ulrik Blidorfimik apersuineq qallunaap filmiliortartup Anne Wivelip nunatta siunissaa pillugu ”Menneskenes Land”-mik taallugu filmiliaanik aallaaveqarpoq.