Namminersulernissaq naalakkersuisunngortitsiniarnermi sunniuteqalissaaq
Savalimmiuni TV-kkut nutaarsiassalerifimmi pisortaq, Øssur Wintereig Karsten sommerip apersorpaa.
Lagtingimi partiit sisamat namminersulivinnissaq anguniakkaminnut ilaatippaat.
Øssur Witereigillu partiit talerperliuniat saamerliuniallu namminersulivinnissamik anguniagaqarnertik pingaartinnerullugu, isumaqatigiinngissutitik pillugit naapiffeqariarlutik naalakkersuisooqatigiilersinnaanerat ilimagineqarsinnaasoq oqaatigaa. Partiit taakkua Danmarkimiit tapiissutigineqartartut millisartuarnissaat pingaartitaraat, tamatumalu maanna unikaallatsinneqarnissaa orniginngilaat. Danmarkimiimmi tapiissutaasartut namminersulivinnissamut akornutaasutut partiit taakku isigaat. Ullumikkut savalimmiuni aningaasartuutaasartut 5 procentiinnaasa nalinga tapiissutigineqartarpoq, tassalu milliartortinneqartuarluni.
Ulloq manna tikillugu qinersisoqannginerani naalakkersuisuutitallit isumaqatigiinniarsimagaluarput, aningaasaqarnerulli qanoq ingerlanneqarnissaa namminersulernissarlu isumaqatigiissutigisinaannginamikkit unnummut isumaqatigiinniarnerit unitsippaat.
Talerperliuniat Folkeflokkenimeersut saamerliillu Republikanerit anguniagaraat ukiut arfinillit qulillu akornanni qaangiuppata Danmarkimiit tapissutinik pisarunnaarnissaq, taamaalillutik ullumikkut Danmarkimiit tapiissutinik pisarani napasinnaannginneraasut oqaasii tunngavissaarutissammata.
Partiit namminersulernissamik anguniagaqartut sisamat tassaasut Republikanerit, Folkeflokken, Centerparti Namminersulerniallu partiiat, ullumikkut Lagtingimi ilaasortat 33-it akornanni 20-nik ilaasortaatitaqarput.
Februarilli ulluisa aappaanni Lagtingimi ilaasortat ataatsimiilerpata Naalakkersuisunngortoqarsimanissaa nalunarpoq, siornatigut naalakkersuisunngortitsiniarluni isumaqatigiinniartarnerit sapaatip akunnerini arlalinni aamma ingerlanneqaqqaartarput.
