Namminersortuni sulisut pissarsisinnaajunnaarput
Aningaasaateqarfiit siulersuisui ippassaq tallimanngormat aalajangerput sulisut suliffeqarfinni aningaasaleeqataaneq ajortuni ajunngitsorsiassaqarsinnaanngitsut.
Kalaallit Nunaanni Sulisitsisut qangalili aningaasaateqarfinnut aningaasaleeqataarusussimanngillat, taamaakkaluartorli SIK-mi ilaasortanut namminersortuni sulisunut kingunerlunneqartissimanngilaq. Aningaasaateqarfinnut Sulisitsisut aningaasaleeqataarusunnginnerata ilaatigut kinguneraa suli illua’tungeriit akornanni isumaqatigiissusiortoqannginnera, tamannalu ukiup aappaata qeqqassaa ingerlavoq.
-Neriussimagaluarpugut isumaqatigiissusiortoqaratarsinnaasoq, kisiannili tamanna neriulussinnarnerusimavoq, Jess G. Berthelsen oqarpoq nangillunilu, aningaasaateqarfinni siulersuisooqataasut pisortaninngaanneersut eqqumiigisimagaat ilaasortat akileeqataanngitsut ajunngitsitsorsiassaqartinneqarsinnaanerat. Taamaattumillu allannguinermik aalajangiisariaqarsimallutik.
