Namminersortuni sulisut akissarsiaginnerupput
Namminersortuni sulisut pisortani sulisunut naleqqiullutik akissarsiakinnerunerarlugit SIK-ip siulitaasuata Jess G Berthelsen-ip oqarnera ilumuunngilaq, sanasoq namminersortoq Nikolaj Ezekiassen oqarpoq.
Allattoq Louise M. Kleemann
SIKip isumaqatigiissutaa naapertorlugu akissarsiallit
namminersortuni sulisut 30niit 60 koruunit tikillugit annerusunik akissarsiaqartinneqartarput.
- Tusarnikuunngisaannarpunga GA-imi ilaasortat akornanni SIK-ip isumaqatigiissutaa ataallugu akissarsiaqartitsisunik, Nikolaj Ezekiassen oqarpoq.
- Sinerissamiit tikittunit tusartarparput, sinerissami sulinermi Nuummi akissarsianut naleqqiullugit appasinnerusunik, kisianni tusarsimanngisaannarpunga, SIK naapertorlugu akissarsianit appasinnerusunik namminersortut akornanni akissarsiaqartitsisunik sanasoq namminersortoq Nuummi najugalik Nikolaj Ezekiassen oqarpoq.