Namminersornissaq Atassummit aalajangiusimaneqarpoq
Atassutip ataatsimeersuarnermini ippassaq ulloq ullaap tungaalu suliassat pingaartitat eqqartornerinut atorpai.
Namminersorneq pillugu najuuttuni ataaseq naaggaassamaarpoq. Qulequtaq pillugu partiip siulittaasua Finn Karlsen ima oqarpoq:
-Namminersornermut tunngatillugu Atassumminngaanniit peqataareereratta, Namminersulernissarput isumaqatigilluinnarparput. Kisianni partiinut allanut sanilliutissagutta piumasaqarpugut. Akisussaaffit imaasiallaannaq tigunianngilagut, oqarpoq.
1979-imi namminersornerulernitta kingorna tigusimasat ilinniarfigisariaqarsorai.
- Piareersarluagaanngitsumik tigusimasagut ullumimut ilungersunartorsiutigaavut. Taamaammat namminersulerutta peqqissaarluinnartumik nalilersoqqissaaqqaarlugit, ataatsikkut tamaasa tigunngikkaluarlugit, ataasiakkaarlugit suliassaqarfiit tigusariaqarsorai.
- Ukiuni arlalinni tigusiartuaarnissatsinnut piffissaqarpugut, Finn Karlsen erseqqissaavoq.
Finn Karlsen isumaqarpoq paasisitsiniaalluarnikkut innuttaasut namminersornermut isumaqataalersinneqarsinnaasut.
-Paasisitsiniaaneq ingerlavoq, qaammatip tulliani Avanersuarmut Tunumullu ingerlaqqittussaavugut.
Partiit tamarmik namminersorneq isumaqatigiilluinnaqqissaarfiginikuummassuk, allamik isummertoqarsimassappat allaasutut isigissallugu Atassutip siulittaasuata oqaatigaa.
- Nalunngilluinnarpaat namminersulernitsinninngaannit ulloq taannamiit aningaasartuutit aallartittussaanngitsut, Finn Karlsen naggasiivoq.