Namminersornerup oqaluttuarisaanerani ulloq pingaartoq

Aatsitassanut tunngasunut akisussaaffiup Nunatsinnit tiguneqarnissaat Inatsisartut siullermeerlugu ualiartoq oqaluuserimmassuk, partiit tamarluinnarmik isumaqatigaat. Tassalu Inatsisartut aappaassaaneerlugu oqaluuserereerpassuk, Namminersornerup atuutilerani oqartussaaffiit tiguneqarsinnaasut siullersaata isumaqatigiinniutigineqalernissaa aqqutissiuunneqassaaq.
Allattoq Jens Thorin
oktobarip 02-at 2009 13:40

Inuussutissarsiornermut naalakkersuisoq, Inuit Ataqatigiinneersoq Ove Karl Berthelsen, ilimasuppoq, tamanna ajornartorsiutitaqassanngitsoq, oqartusaaffillu Namminersorlutik Oqartussat ukiortaamiit tigusinnaassagaat.

Ove Karl Berthelsen Inatsisartut isumaqatigiilluinnerannut nuannaaqaaq:

- Nunarput piluaqqusariaqarpara, qinikkat tamarmik taama isumaqatigiitsigalutik Nunatsinni aatsitassaqarnermut uuliasiornermullu akisussaaffiit tamaasa naalagaaffimmiit tigunissaannut isumaqatigiinniarnissatsinnut akuerimmatigut, Ove Karl Berthelsen oqarpoq.

Naalakkersuisut siunniuppaat, aatsitassanut tunngasunut akisussaaffik 2010-mi ukiortaami aallarnerfigalugu tiguneqassasut.

Ove Karl Berthelsen naatsorsuutigaa, danskit oqartussaannut isumaqatigiinniarnerit paaseqatigiiffiullutik ajornartorsiutitaqanngitsumillu pissasut.

- Naalagaaffimmi oqartussassaasunut isumaqatigiinniutigisssavarput, qanoq ilillugu qaqugulu tiguneqarnissaanut piareersaassanersugut.

Oqartariaqarpunga, Naalakkersuisut siulitta namminersorneq pillugu isumaqatigiinniarnermi aqqutissat annersaat piareersareersimagaat, taamaattumillu uagut artorsarpallaarata ingerlanissatsinnut aqqutissiuutereersimammatigut, ilimagaara, akisussaaffik januaarip aallaqqaataani tigusinnaassagipput, inuussutissarsiornermut naalakkersuisoq oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq