Namminersornerullutik Oqartussat sammiviliisuupput

Namminersorlutik Oqartussat 22 millionit koruuninik taarseeqqusinerat unnerluutigineqartut illersuisuata akerlilerpaa, oqarluni Puisi A/S-ip pilersinneqarnerani akiliisinnaajunnaaneranilu politikki pissutaasimasoq. Illersuisup eqqartuussinermi illersuinera Puisi A/S-ip aallartinneranik nassuiaanermik aallartippoq.

Siulersuisuni ilaasortaasimasut unnerluutigineqartut, aalajangigassat amerlasuut namminneq aalajangersinnaasimanngilaat. Puisi A/S-imi suleriaasissaq Puisi A/S-ip pilersinneqarnerani aalajangerneqareersimammat, ilaatigut isumassarsisoq David Stevens suleqatigineqassasoq, Kinamut tunisassiortoqassasoq, Nanortalimmi Royal Greenlandip suliffeqarfissuarisimasaani puisit neqaat pølsiliaralugit tunisassiarineqassasut minnerunngitsumillu puisit tunisassiarineqassasut aalajangeriigaasimapput.

- Siulersuisut puisimik tunisassiornissaq unitsillugu tuttumit pølsiliorsinnaasimappata, imaluunniit suliffissuaq Nuummut inissinneqarsinnaasimava? Inatsisileritooq Nicholas Symes unnerluutigineqartut sinnerlugit aperivoq, namminerlu akilluni:

- Naagga, taamaattoqarsinnaasimanngilaq, tunngavissammi aalajangerneqareersimapput, taama akivoq.

Namminersornerullutik Oqartussat Puisi A/S-ip 50 procentia piginneqataaffigaat, Namminersornerullutik Oqartussallu Royal Greenlandiutaata Puisi A/S-ip 25 procentia piginneqataaffigalugu, taakkulu Puisi A/S-imut tunngavissat aalajangereersimavaat.

Puisi A/S-ip allanngortiterneqarsimannginnera, taamaalillunilu aningaasarsiorfissanik allanik ujaasisoqarsimannginnera, siulersuisuni ilaasortaasimasunut avoqqaarinnissutissaanngitsut inatsisilerituut oqarput, siulersuisut taama aalajangiisinnaannginnamik, aalajangeeqqusaasimannginnamillu.

- Suliffeqarfik piginnittunut naleqalersillugu ingerlanneqartussaavoq. Kisiannili taanna nalilimmik pilersitaq aningaasaasariaqanngilaq soorlu suliami uani nalilik taanna politikikkut anguniagaasimasoq. Siulersuisullu anguniagaq taanna malissimanngikkunikku, piginnittut piumasaat malissimassanngilaat, Nicholas Symes taama oqarpoq.

Tunisassiorneq Nanortalimmi ingerlanneqartussatut aalajangerneqarmat, aningaasarsiorfiusinnaanerpaaq malinneqarsimanngilaq tassami kujataani suliffissaaleqineq annertooq anigorniarlugu, Royal Greenlandilu suliffissuarmik atorneqanngitsumik Nanortalimmi peqarmat, taama aalajangiisoqarsimalluni. Tuttullu tunisassiarineqaratik puisi tunisassiarineqarmat, aningaasarsiorfissat pitsaanerpaat suuneri aalajangiinermut apeqqutaasimanngillat, puisilli amiinnaa kisimi piniartunit iluanaarutaassanngimmat taama aalajangiisoqarsimalluni. Puisip neqaa pølsiliarineqartussatut, orsualu nerisassanut ilanngutassiaralugu iisartakkiarineqartussatut allaallu puisip usua Kinami tissassinnaajunnaarnermut ikiorsiissutissatut tunisassiarineqarnissaanik aalajangiisoqarsimavoq.

Inuiaqatigiinni ajunngitsumik siunertaqarluni Puisi A/S pilersinneqarsimavoq, tamannalu aningaasarsiorfiusinnaanngilaq. Misilerarneqarnikuunngitsunillu aallartitsigaanni ajutoorfissat amerlasarput.

- Soorunami nalunngeriikkatsinnik, soorlu raajanik suliffissuarmik aallartitsinerusimasuuppat, tunisassiarineqarnikuunngitsunik aallartitsinani, nalorniartut ikinnerusimassagaluarput, inatsisileritooq Phillip Thorsen oqarpoq.

Tamanna Namminersornerullutik Oqartussat nalunngilaat. Namminerli aalajangersimavaat puisimik tunisassiortoqassasoq. Siulersuisullu suliamik taama nalorninartigisumik aallartitsisut suliap iluatsinngitsoorneranut pillarneqassanngillat, unnerluutigineqartut illersuisuat taama tunngavilersuivoq.

Aqagu suliaq ingerlateqqinneqassaaq. Eqqartuussivimmi tunngavilersuutit saqqummiunneqareersut naggammik saqqummiunneqaqqissallutik, maannamullu Puisi A/S pillugu suliamut nutaarsiassaatigisimasavut nittartakkatsinni knr.gl-imi atuarsinnaavatit.