Namminersornerullutik Oqartussat piginneqataanissaq ornigivaat

Namminersornerullutik Oqartussat piginneqataanissartik maannakkut ornigineruaat, taamaalillutik aningaasartuutit isertitallu Alcoalu aviffigeqatigiittarniassagamikkit.

Aatsitsiviliornissaq, erngup nukinganik nukissiorfiliornissaq tassanngaanniillu kallerup innerata aqqutissaanik sananissat 19-it 23 milliardi koruunillu missaanni akeqarnissaat naatsorsuutigineqarpoq, taakkualu Kalaallit Nunaanni aningaasat kaaviiaartinneqartartut marloriaatigaat, assigiinnarpaa Danmarki Sverigep tungaanut ikaartarfinnik 125-nik sananiarluni aalajangeraluarpat. Naalakkersuisut sanaassanik piginneqataanissartik aalajangiutivissagunikku Inuutissarsiornermut Naalakkersuisoqarfimmi atorfillip, Jakob Mathiassenip oqaasii naapertorlugit piginneqatigiiffiliortoqassaaq, taamaalissappallu Alcoa Namminersornerullutillu Oqartussat tamarmik immikkut 2,5 milliardi koruuninik piginneqatigiiffissamut aningaasaliissapput. Naalakkersuisunut ilaasortap, Siverth K. Heilmannip ippassaq saqqummiussinermini oqaasii naapertorlugit aningaasaliissutissat nunanit allanit atorniarnikkut matussuserneqarsinnaassapput. Sinnerilu 15 milliardi koruunit piginneqatigiiffissap atorniartariaqassavai.

Taassuma saniatigut soorlu ukiut 30-t 50-illuunniit qaangiuppata erngup nukinganik nukissiorfiit Kalaallit Nunaannut tunniunneqarnissaat pillugu isumaqatigiissusiortoqassaaq.

Piginneqatigiinneq piginnittuunermut periaatsitut qinerneqassappat Namminersornerullutik Oqartussat annertoorujussuarmik aningaasaliissuteqaqqaassapput, suliariniagarli sinneqartoortalissappat aamma aningaasarpassuarnik isertitaqartalersinnaassapput.

Aluminiumik aatsitsivissaq ukiumut 4,5 milliardi koruuninik kaaviiaartitaqartalissasoq naatsorsuutigineqarpoq.