Namminersornerullutik Oqartussat Danmarkimiit aqunneqalerallaqqullugit Dansk Folkeparti piumasaqarpoq, ilalerneqarnanili
”Kalaallit Nunaata ikiorneqarnissi pisariaqartippaa, taama oqarpoq Line Barfod Enhedslistemeersoq nangillunilu: Ajortumeerinerusussaavoq Danmarkip namminersornerulluni oqartussaaneq atorunnaarsikkallassagaluarpagu – taamalu pisoqassappat Kalaallit Nunaata Danmarkillu susassaqaqatigiinnerat angisuumik innarlerneqartussaavoq.
Enhedslistep Danmarkimilu partiit allat Dansk Folkepartip piumasaqaataanut akerliupput. Qularnaapporli Danmarkimi partiit DR 1-ip aallakaatitassiaanit annertuumik attortimmata. ”Aallakaatitassiaq Kalaallit Nunaaniit qimaaneq sakkortuvoq, iluaqutaanngilluinnarporli Søren Espersen angussuaasaarniarsarimmat, matumani aqqutissatuaavoq oqaloqatigiilluarneq ikioqatigiinnerlu, Line Barfod oqarpoq. Radikalit Inunnik Isumaginninnermut oqaaseqartartua Marianne Jelved oqarpoq Danmark nunasiaateqarsimasutut angisuumik akisussaataqaasoq. – Iluaqutaanavianngilarli ungasinganiit iluarsiiniassagutta, aaqqiiniassaagut kalaallit oqartussaasui peqatigalugit, Marianne Jelved oqarpoq. Marianne Jelvedip danskit naalakkersuisui kaammattorpai Kalaallit Nunaanni pissutsinik ilungersunartunik aaqqiiniarnermi suleqataaqqullugit. – Kalaallit Nunaat naalagaaffeqatigaarput taamaattumik akisussaaqataanerput nassuerutigalugu danskit naalakkersuisui kaammattorusuppakka ikorfartueqqullugit, Marianne Jelved oqarpoq.
Konservativit Kalaallit Nunaat pillugu oqaaseqartartua, Namminersornerlu pillugu isumasioqatigiinni ilaasortaasoq, Per Ørum Jørgensen, oqarpoq, Kalaallit Nunaanni pisut alianartuusut sakkortullutillu. – Isiginngitsuusaaginnarsinnaajunnaarpavut, iliuuseqapallattoqartariaqarpoq, Per Ørum Jørgensen oqarpoq. Venstreneersoq Birthe Rønn Hornbeck, aamma Namminersorneq pillugu isumasioqatigiinni ilaasortaasoq, Dansk Folkepartip kalaallinik oqartussaajunnaarsitsiniarneranut naaggaarpoq. – Kalaallit inuiaat imminnut ataqqisuupput
taamaammat Kalaallit Nunaanni inuit nalinginnaat kaammattuinnarusuppakka politikeriminnut piumasaqarneruleqqullugit. ”Flugten fra Grønland” kalaallisut oqaasertalersorlugu KNR-TV-mi unnugu aallakaatinneqassaaq.
