Namminersornermut qulartut naaggaartullu amerlanerupput
Narsap katersortarfiani unnummut innuttaasunik tamanut ammasumik Namminersulernissaq pillugu ataatsimiititsinissaq sioqqullugu, suleqatitta Judith Hard Peilmann –p Narsami taasisinnaasut 1.415 –t ilai qanoq isummiussaqarsimanerinik paasiniaavigai.
Namminersulernissatsinnut angerpit, naaggaarpit imaluunniit nalornivit?
-Angerujussuarpunga, pissutigalugu qallunaat Naalagaaffianiinnerput naammaleqimmat piffissanngorsoriivikkakku maannakkut Namminiilivinnissarput.
-Nalornissuteqanngiivippunga Savalimmiormiut ukiut 6-nillit inooqatigisareersimagakkit nammineerniarsaralutik inuusut, taaama oqarpoq angut utoqqasaaq, nangipporlu:
-Piumassuseqarnerusuugutta ingerlasinnaagaluarpugut piumassuseqanngikkutta nukissaqanngilagut.
Illit angertorujussuuvutit sooq angerpit?
Tassa alloriaqqittariaqaratta. Aamma pissusissamisoorpasikkami taamaannera. Paasisat naapertorlugit nalornisorpassuupput, qanoq iliussappat isummat malillugu?
-Tassa eqqarsaqqittariaqassapput aamma alloriaqqittariaqarpugut, kisianni alloriaqqissagutta aqutsisoqartariaqarpugut pikkorissunik.
Illit naaggaarniarputit imaluunniit suli nalornivutit?
-Suli nalornivunga ullumikkut pissutsit eqqarsaatigalugit aningaasarsiornerput suli taama nakkangatigisoq, tamakku eqqarsaatigalugit suli nangaavunga. Akuerisinnaagaluarpara Namminersulernissarput, piniartoq aalisartorlu taama oqarpoq, aamma oqarpoq:
-Peqqinnissaqarfik tigujaarsimavallaaqaarput, aningaasat tungaatigut ullumikkut kinguarsimaqaagut. Suna tamarmi qaffakkiartortillugu Namminersulernissarput utaqqissutilaartariaqaraluarparput.
Illit sooq nalornivit?
Tassa uagut utoqqanngornikuulluta akuleruppallaartorsuujunnaaratta, erseqqissaaffigineqarnerusuugutta immaqa nalorninannginnerussagaluarpoq.
Sooq illit naaggaarpit?
Tassa isumaqarama suli piariinngitsugut, nammineq oorissaqanngilagut, taava tassa taanna peqqutigalugu isumaqarpunga piariinngitsugut.
Naaggaassuunga uanga. Sooruna? Piareeqqaarluta. Akissaqalerutta. Suna tamarmi akitsoraluttuinnartoq, suna tamarmi ajornarsigaluttuinnarpoq. Akissarsiorfeqanngitsorpassuit! Naamik, Nammineersinnaalernissarput nalorninartorujussuuvoq.
Siumut Innuusuttaasa Kattuffiata tamanut ammasumik innuttaasunik Narsap Katersortarfiani Namminersulernissaq pillugu unnummut nal. 19.00 ataatsimiititsinerat aallartippoq.
