Namminersorneq pillugu paasititsiniaaneq aallartinnerluppoq
Kalaallit Nunaata Radioata sapaatip akunnerini marlunni qarasaasiakkut isumasiuilluni taasititsinera naapertorlugu, inuit tallimaangaangata ataasiinnaq nalunaartarpoq quppersagaq atuarsimallugu. Tusarniaanitsinnut atatillugu inuit toqqarlugit aperaagut: Namminersorneq pillugu kalaallit qallunaallu Isumalioqatigiissitaasa Kalaallit Nunaanni namminersornermik Isumaliutissiissutaata eqikkarnera atuarsimaneraat ?
Isumasiuinermi akipput inuit 760-t taakkulu 80 procentiisa oqaatigaat Isumaliutissiissutip eqikkarnera atuarsimanagu.
Tusagassiortunngorniat atuarfiani ningiuusup Naja Paulsenip siusinnerusukkut radioavisimi quppersagaq isornartorsiorpaa oqarluni, eqikkagaq atuaruminaappallaartoq paasiuminaappallaarlunilu.
Namminersorneq pillugu allaffimmi immikkoortortaqarfimmi pisortap Mininnguaq Kleistip akissuteqarami Naja Paulsen isumaqatiginerarpaa aammali oqarpoq eqikkagaq allatut ilusilerneqarsinnaasimanngitsoq itisuumik paasititsiniaasoqartariaqarmat. Isornartorsiutaasumut akissuteqarnermi Mininnguaq Kleist aamma oqarpoq innuttaasut piumasaqarfigineqalaarsinnaasariaqartut.
