Namminersorneq pillugu oqallinneq Københavnip Universititianut annguppoq
Oqallinneq Folketingimi Atlantikup Avannaaneersunit aaqqissorneqarsimavoq. Namminersorneq pillugu allaffimi pisortaq, Mininnguaq Kleist inatsisillu inuiannut tamanut tunngasut pillugit professori Ole Spiermann namminersorneq pillugu saqqummeereermata tusarnaartut apeqquteqaqattaarput. Tusarnaartut Radioaviisimiit oqaloqatigineqartut taamatut aaqqissuineq iluarisimaarpaat.
- Paasisaqarneruvunga, apeqqutinik assigiinngitsunik akineqarluartutut misigivunga. Taasisinnaassanguma namminersornermut angerniarpunga. Tusarparput Mira Kleist Copenhagen Business Schoolimi niuernermi oqaatsit pillugit ilinniartoq.
Tusarnaariat ilagaat eqqumiitsuliortoq, Inuk Silis Høegh. Taanna oqarpoq
isumaqartuarluni Kalaallit Nunaat siunissami namminersulerlunilu namminiilivissasoq. Namminersornermulli maanna angerniarluni aningaasanut tunngasut aporfigisimagaluarlugit, paasissutissiinermili paasillugu Danmarkimiit akisussaaffinnik nussuisinnaaneq piareerutta oqilisarneqassasoq, taamaammat maannakkut namminersornermut angernissani qulakkeerlugu. Kalaallit Nunaanniit nammineq ineriartorneq aalajangersorneqarniassammat, soorlulusooq angajoqqaat qimallugit nammineq angerlarsimaffeqalerluni, Inuk Silis Høgh taama oqarpoq.
